KOFOFIN BIRNIN KANO

Wasu daga cikin Kofofin birnin Kano. Daga sama hagu zuwa dama ; Kofar Waika, Kofar Mazugal, Kofar Ruwa. Daga kasa hagu zuwa dama; Sabuwar Kofa, Kofar Gadon Kaya, Kofar Dan Agundi

Kamar yadda muka yi bayanin yadda aka gina Ganuwar Kano, to haka kuma akwai kofofi daban-daban da suke a bangarori daban-daban na ita Ganuwar. A yanzu akwai kofofin shiga birnin Kano har guda Goma Sha biyar. Akwai wata waka da Alhaji Ahmad Bahago ya kawo a littafin sa mai suna "Kano Ta Dabo Tumbin Giwa: Tarihin Unguwannin Kano da Mazaunanta da Ganuwa da Kofofin Gari" ya zayyano kofofin shiga birnin Kano a waka kamar haka ;

"Ta Kansakali ta Kabuga, Gadon Kaya Dukawuya. Adama Kofar Ruwa, Mazugal Wamban Kano. Ta Nassarawa, Dan Agundi Na'isa Kofar Midil. Kofar Waika ga Dawanau mun zagayo Kofar Famfo duka"

Taswirar Ganuwar Kano da Kofofin ta

A takaice dai birnin Kano yana da kofofin shiga cikin birni har guda goma sha biyar. Ga jerin Kofofin da kuma shekarar da aka gina su kamar haka:

1. Kofar Kansakali (1112 A.D.)
2. Kofar Waika (1112 A.D.)
3. Kofar Dawanau (1112 A.D.)
4. Kofar Ruwa (1112 A.D.)
5. Kofar Mazugal (1112 A.D.)
6. Kofar Wambai (1112 A.D.)
7. Kofar Mata (1461)
8. Kofar Nassarawa (1463)
9. Sabuwar Kofar (1934)
10. Kofar Dan Agundi (1463)
11. Kofar Na'isa (1470)
12. Kofar Gadon Kaya (1619)
13. Kofar Famfo (1928)
14. Kofar Dukawuya (1621)
15. Kofar Kabuga (1621)